Чехийн холбооны улсын Злын хот дах Монголчуудын бүлгэм: June 2008

Мэдээллийн эх сурвалж: news.mymongol.com

Өдрийн сонин, Б.ЦэцэгдэлгэрВэблэсэн: 2008 / 5 / 31

Улсын нийгмийн даатгалын ерөнхий газрын (УНДЕГ) дарга С.Эрдэнэ уржигдар албан ажлаа хүлээлгэн өгсөн тухайгаа мэдээллээ. Учир нь тэрбээр УИХ-ын сонгуульд Ардчилсан намаас дэвших гэж байгаа аж.

С.Эрдэнэ дарга УНДЕГ-ыг удирдаж байх хугацаандаа хийж амжуулсан ажлынхаа тайланг тавьж байлаа. Хэвлэлийн бага хурлын үеэр түүнээс зарим зүйлийг тодрууллаа.

-БНСУ-д ажиллаж, амьдарч байсан иргэд нийгмийн даатгалын шимтгэлээ буцаан авч байгаа. Энэ ажлын явц ямар байна вэ?

-БНСУ-д гэрээгээр ажиллаж, амьдарч байх хугацаандаа тус улсын Үндэсний тэтгэврийн алба (ҮТА)-нд шимтгэл төлж байсан иргэдийн шимтгэлийн мөнгийг буцаан олгох шийдвэр өнгөрсөн оны тавдугаар сард гарсан. Энэ ажилд манай байгууллага үндэсний зуучлагчийн үүрэг гүйцэтгэж байгаа. ҮТА-аас мэдээлсэн шимтгэл буцаан авах эрхтэй 12363 иргэний тэтгэврийн шимтгэлийн 14 гаруй тэрбум төгрөгийн нэхэмжлэлийг тэдэнд хүргүүлдэг. Энэ сарын 15-ны байдлаар 2050 хүнд нийт гурван тэрбум төгрөгийг олгоод байна.

-Бичиг баримтаа бүрдүүлж өгчихөөд, мөнгөө хүлээж байгаа хүмүүс бий байх. Тэр хүмүүсийн мөнгийг хэзээ өгч дуусгах вэ?

-Манайх 200-300 хүний бичиг баримтыг багцлаад ҮТА-нд хүргүүлдэг. Тэр байгууллага нь бичиг баримтыг сарын дотор хянаж, мөнгийг нь явуулах шийдвэр гаргадаг. Одоогийн байдлаар манай байгууллагад 400 шахам хүний бичиг баримт бий. Энэ онд нийт иргэний 60 гаруй хувьд нь мөнгө олгочих төлөвлөгөөтэй ажиллаж байна. Ирэх жил гэхэд дуусгах байх. Иргэдийн бичиг баримт цуглуулахад бэрхшээл их байдаг л даа.

-Тухайлбал?

-Тэтгэврийн шимтгэлээ буцаан авах эрх бүхий иргэдийн 50 гаруй хувь нь гадаадад ажиллаж, амьдарч байгаа. Тухайлбал, мөнгө авах хүн Англид байлаа гэхэд Элчин сайдын яамаараа дамжуулан итгэмжлэхээ энд байгаа хамаатан садан руугаа явуулах ёстой. Харин мөнгө нь онлайн банкаар өөрт нь очно. Энэ хооронд цаг хугацаа их зарцуулдаг.

-Мөнгөө авсан хүмүүс Монголд нийгмийн даатгалд хамрагдах ёстой юу?

-ҮТА-нд шимтгэл төлсөн хугацаагаараа Монгол Улсын тэтгэврийн даатгалд хамрагдах ёстой. Солонгост ажилласан жилийнхээ хугацаагаар даатгал төлснөөр ажилласан жил нь нэмэгдэнэ гэсэн үг. Солонгост ажиллаж байсан, одоо ажиллаж байгаа иргэдийн нийт 593.2 сая төгрөгийг тэтгэврийн даатгалын санд төвлөрүүллээ.

-БНСУ-аас өөр улс оронд ажиллаж, амьдарч байсан иргэд даатгалын мөнгөө буцаан авах боломж бий юу?

-Гадаадад амьдарч, ажиллаж байгаа иргэд тэтгэврийн албанд л шимтгэл төлдөг. Сүүлийн гурван жилд 80 гаруй мянган монгол хүн гадаад улс орнуудад амьдарч байгаа судалгаа бий. Бид АНУ, Англи, ХБНГУ, Чех, Польш, Умард Ирланд зэрэг улсуудын тэтгэвэр, нийгмийн үйлчилгээ хариуцсан байгууллагуудтай гэрээ, хэлэлцээр хийж эхлээд байна. Тухайлбал, Чех, Унгар улсуудтай хоёр талын Засгийн газар нийгмийн хамгааллын салбарт хамтран ажиллах гэрээнд гарын үсэг зурах бэлтгэл хангагдсан. Ирэх сард гэрээ бараг батлагдах байх. Тэгвэл дээрх орнуудад ажиллаж, амьдарч байсан иргэд шимтгэлийн мөнгөө буцаан авах боломжтой болох юм. Мөн Англи, Ирланд улсын Засгийн газруудтай хамтран ажиллах гэрээний эхлэл тавигдаад байна.

Бичсэн: Г.Ганболд

Баасан, 2008 06-сарын 20

ЭСЯ-ны ерөнхий консул Г. Ганболд хариулж байна.
Асуулт: АНУ-д ажил эрхлэх боломжтой ямар ямар виз байдаг вэ?

Хариулт: Ажлын виз болон ажиллах зөвшөөрлийг цагаачлалын бус бусад ангилалын виз олгодог журамд хамруулдаг. Гэхдээ гол зорилго нь хөдөлмөр эрхлэхэд оршдог тул оюутан F, дадлагажигч M, солилцооны хөтөлбөрт хамаарагдагч J, төлбөр нь гадаадаас хийгддэг жуулчны В ангиллаас ялгаатай авч үздэг.

Түр хугацаагаар ажиллагсдын визийг гэрээт худалдаачид, хөрөнгө оруулагчдын Е, сувилагчдын Н, онцгой гавъяа, авъяас чадвартай буюу ховор мэргэжлийн хүмүүсийн Н-1, шинэ технологи, компьютерын болон цахилгааны инженерийн Н-1В, үндэстэн дамнасан бизнесийн салбар хооронд шилжигсдийн L-1 гэж ангилдаг.

Удаан хугацаагаар ажилладаг, олон улсын чанартай Е, L-1 ангилалтай холбоотой хууль тогтоомж олон боловч агуулга нь ойролцоо. Түр хугацаагаар ажиллагсдын Н-2 ангиллыг хөдөө аж ахуйн салбарын ажиллагсдын Н-2А буюу бусад салбарт ажиллагсдын Н-2В гэж мөн ангилдаг.

Онцгой гавъяа, авъяас чадвартай хүмүүсийн Н-1 ангилалд урьд нь сувилагчид, тамирчид, жүжигчид багтдаг байсан боловч Конгрессоос 1989 онд баталсан хуулиар мэргэжлийн сувилагчдад шинэ Н-1А ангилал бий болгосноо төдөлгүй Н-1В болгон өөрчилж, бусад мэргэжлийн болон авъяаслаг ажилчдыг хамааруулдаг болсон.

Цагаачлалын 1990, 1991 оны хуулийн нэмэлтээр Н-1В ангиллыг нарийн мэргэжлээр хязгаарлаж, Хөдөлмөрийн нөхцлийн өргөдөл (Labor condition application-LCA)-ийг шаарддаг болгож, нэг жилд шийдвэрлэх өргөдөлд тооны хязгаар тогтоосон.

Онцгой авъяастай гадаадын хүмүүст О, урлагийн тоглолтоор ирэх жүжигчид, тамирчдад Р ангилал тогтоон Н-1В ангиллаас хассан. Эдгээр ангиллын визийн өргөдлийг зөвшөөрөхөөс өмнө холбогдох ажил мэргэжлийн холбоодтой зөвшилцдөг.

Шашны байгууллагын шугамаар ажиллагсдад R-1 ангилал бий болгосон. Эмч нар Н-1В ангилалд хамаарагддаг. Бизнесын чиглэлээр ажиллагсдын цагаачлалын бус визийг олон улсын чанартай бизнес эрхлэгчдийн (E болон L-1), АНУ-ын аливаа бизнест ажиллах хүмүүсийн (O-1, H-1B, чөлөөт худалдаа, H-2B) болон тусгай салбарын үйлдвэрлэлийн гэж гурав ангилдаг.

Асуулт: АНУ-д түр хугацаагаар мөнгөний ажил хийхэд ямар ангиллын виз мэдүүлэх вэ?

Хариулт: Аливаа ажил, албан тушаалын болзол шаардлагыг гагцхүү АНУ-ын иргэд хангадаг байх албагүй.Тиймээс өрсөлдөх чадвараа нэмэгдүүлэхийг сонирхдог, нарийн мэргэжилтэй, ажлын дадлага чадвартай ажилтанг авч ажиллуулахад анхаардаг пүүс компаниуд гадаадын иргэдийг урьж ажиллуулдаг. Тэдгээр гадаадын иргэн - АНУ-д Н1В визээр ирдэг. Жил бүрийн 4 дүгээр сарын 1-нээс эхлэн хэн түрүүлж мэдүүлсэн, 65 мянган хүнд олгогддог энэ ангиллын виз өнгөрөгч онд олгож эхлээд 48 цаг хүрэлгүй дууссан нь түүний эрэлт их байгааг харуулж байна.

Тодорхой мэргэжлийн ажил (Speciality occupation), албан тушаал ( Professional position) эрхлэх нэгнийг АНУ-д түр хугацаагаар авчирах зориулалттай Н1В ангиллын виз мэдүүлэгч наад зах нь баклавар буюу түүнтэй дүйх шатны, шаардлагатай бол төрөөс итгэмжлэгдсэн түвшний боловсрол эзэмшсэн байх шаардлагатай.

Мэргэжлийн ажил гэдэгт уран барилга, инженер, математик, физик, нийгмийн шинжлэх ухаан, анагаах, эрүүл мэнд, боловсрол, хууль, нягтлан бодох, бизнесс, холбоо мэдээллийн технологи, урлагийн зэрэг өргөн хүрээний төрөл мэргэжлийн онолын болон практикийн мэдлэг шаардсан ажлууд багтдаг. Энэ ангиллын визтэй ажилчин түүнийг ивээн тэтгэсэн ажил олгогчид л хүчин зүтгэх бөгөөд гэр бүл, 21 нас хүрээгүй хүүхдүүдээ Н4 визээр авчирч дунд сургуульд сургах боломжтой. Ажил солих тохиолдолд тусгай маягтаар өргөдөл гаргаж зөвшөөрөл авдаг.

Асуулт: Түр ажиллах зөвшөөрөл аваад үлдэх боломж бий юу?

Хариулт: Н-1В ангиллын визээр АНУ-ын компаниудын ажиллах хүчний хэрэгцээг хангахдаа тухайн ажилчны АНУ-д байнга оршин суух хүсэлттэй хамтатгахгүй гэдэг зарчим баримталдаг.

Нэгэнт түр хугацааны виз болохоор АНУ-д оршин суух хугацааг эхний удаа гурван жилээр заадаг, дахин гурван жилээр сунгаж болно.Сунгахын тулд ажил олгогч өргөдөл гаргадаг. Зургаан жилийн дараа тухайн ажилчин дахин Н1В виз мэдүүлэхийн тулд АНУ-аас нэг жилийн хугацаагаар гарч явсан байх шаардлагатай. Гэхдээ нэгэнт виз авсан ажилчинд ажил олгогч нь эхний гурван жилд багтан байнга оршин суух зөвшөөрөл мэдүүлж болно. Байнга оршин суух зөвшөөрөл буюу “ногоон карт” олдоогүй тохиолдолд тухайн ажилчин ногоон карт мэдүүлсэн байхад зургаан жил нь хэтэрсэн ч АНУ-д холбогдох журмын дагуу оршин суух боломжтой.

Ажил олгогч гадаадын мэргэжилтэй ажилчинг ивээн тэтгэхийн тулд Хөдөлмөрийн яамандаа хандаж тухайн албан тушаал, цалингийн хэмжээг дурдсан Ажлын байрны өргөдөл буюу (Labor Condition Application) бүрдүүлж өгдөг, зөвшөөрөгдсөн нөхцөлд АНУ-ын Харьяатын болон Цагаачлалын алба-ХЦА (US Citizenship and Immigration Services)-нд өргөдөл гаргана. Чингэхдээ тухайн албан тушаал наад зах нь баклавар буюу түүнтэй дүйх шатны мэдлэг боловсрол шаардахыг нотлох шаардлагатай.

Ажилчин өөрийгөө ажил олгогчийн санал болгосон тухайн мэргэжлийн ажилд буюу албан тушаалд тохирч тэнцэнэ гэдгийг нотлохоос гадна их сургууль төгсгөсөн диплом, ажлын дадлага туршлагыг нь илтгэсэн нотолгоог АНУ-д хүлээн зөвшөөрөгдсөн хэлбэрээр бүрдүүлэх шаардлагатай. Дээд боловсролын диплом, нарийн мэргэжлийн үнэмлэхийг хүлээн зөвшөөрөх үйл ажиллагааг ихэвчлэн мэргэжлийн холбоодын шугамаар төлбөртэй хийж гүйцэтгэдэг.

Жилд Н1В визийг баклаврын зэрэг бүхий 65 мянган хүнд олгодгоос гадна АНУ-д Мастерийн зэрэг хамгаалсан хүмүүст нэмж 20 мянган ширхэг виз олгодог, их сургууль, коллежуудад ажиллах хүмүүс дээрх тоонд хамрагддаггүй.

Мэргэжлийн дипломыг зөвшөөрүүлэх, ажлын байрны тодорхойлолт үйлдэх, үнэлгээ хийх, бичиг баримтуудыг орчуулах, өргөдөл гаргах ажлыг оны эхнээс хийж эхлэхэд багагүй хугацаа шаардагддаг тул тэдгээрийг эцсийн байдлаар эмхлэн бүрдүүлж шуудангаар 4 дүгээр сарын 1 гэхэд илгээхэд бэлэн болгосон байх шаардлагатай.

Н-1В виз хүссэн өргөдлийг ажлын байрны нэр, гүйцэтгэх үүрэг, олгох цалин, ажлын шаардлага, боловсролын шалгуур, компаны санхүүгийн боломж зэрэг хөдөлмөрийн нөхцлийг нягтлан шалгасны дараа тухайн хүний ажиллах нутаг дэвсгэрийн харьяаллын дагуу ХЦА-ны бүсийн үйлчилгээний төвд гаргана.

Өмгөөлөгч шаардлагатай тохиолдолд G-28, I-129 маягтаас гадна Н нэмэлт болон шинэчилсэн I-129 W маягт бөглөнө. Хураамжийн 130 ам. доллараас гадна ажил олгогч 1000 ам. доллар төлсөн баримтыг хавсаргадаг бөгөөд бизнесийн болон эрхлэх ажлын шинж чанар, тухайн ажлын мэргэжил шаардах онцлог, боловсролын байдлыг тодорхойлж, баримтаар нотолгсон ажил олгогчийн захиаг хавсаргана.

ХЦА мэргэжил шаардах ажлын жагсаалт гаргадаг боловч Холбооны шүүх. мэргэжил шаардах ажлыг урьдчилан хуульчлан тогтоох боломжгүй гэж үзсэн учир энэ жагсаалтыг явцуу гэж шүүмжилдэг .

Ажил олгогчоос гаргасан ажлын байрны тодорхойлолт, тайлбар шийдвэрлэх үүрэгтэй. Н-1В визээр ажиллуулах мэргэжилтний тоог тогтоодог ч тухайн жилд шаардлагатай мэргэжилтний тухай мэдээллийг Холбооны бүртгэл (Federal Register)-ээр мэдээлдэг.

ХЦА Хөдөлмөрийн департаментаас гаргадаг Ажил мэргэжлийн нэрийн толь бичиг (Dictionary of Occupational Titles), бусад код, жагсаалтыг өргөн ашигладаг. Ажил олгогч эдгээрийг Хөдөлмөрийн департаментын вэб.хуудаснаас үзэж болно.

ЭСЯ-ны Консулын хэлтсийн дарга Г.Ганболд